Монголын Урчуудын Эвлэлийн гишүүн зураач М.Баярмагнай нь 1966 онд Улаанбаатар хотод төрсөн.1974 онд нийслэлийн 10 жилийн 1 дунд сургуульд элсэн бага бүрэн дунд боловсрол эзэмшиж, 1982 онд Дүрслэх урлагийн дунд сургуульд элсэн 1987 онд Монгол зургийн зураач мэргэжлээр төгссөн. 1997 Дүрслэх урлагийн дээд сургуулийг бакалавр,  1999 онд СУИС–д “Марзан Шаравын уран бүтээл дэх эмэгтэй хүний  дүр дүрслэл” сэдвээр магистрын зэрэг хамгаалсан.

1987 оноос Улаанбаатар хотын урчуудын эвлэлийн салбарт зураач, 1995 оноос эдүгээ хүртэл Монголын урчуудын эвлэлийн гишүүн чөлөөт уран бүтээлчээр дүрслэх урлагийн салбарт тасралтгүй 30 н жил ажиллаж байгаа эмэгтэй зураач юм. Тэрээр жил бүр Монголын урчуудын эвлэлийн хорооноос зохион байгуулагддаг хавар, намар, шилдэг бүтээлийн үзэсгэлэнд тогмол оролцдог бөгөөд уран бүтээлүүдээрээ Болгар, Унгар, Польш, Австри, Финлянд, Франц, Солонгос,Япон ,Хятад, Энэтхэг, ОХУ- зэрэг улс орнуудад өөрийн орны соёл дурслэх урлагийн онцлогийг таниулсан  уран бүтээлч юм.. Их Монгол улс байгуулагдсаны 800 жилийн ойн Үндэсний хороо, Монголын Урчуудын эвлэлийн хорооноос зохион байгуулсан “ИХ МОНГОЛ” дүрслэх урлагийн уран бүтээлийн уралдаанд зураач М.Баярмагнайн “ Их бишрэл” бүтээл нь тэргүүн байр эзэлж эдүгээ Монголын улсын уран зургийн галерейн сан хөмрөгт хадгалагдаж байна.

“Торгоны зам ба Дэлхийн соёл иргэншил” сэдэвтэй Бээжингийн Олон Улсын Урлагийн Biennale  Хятадын Үндэсний урлагийн Музейд 2017 оны 9-р сарын 24-нээс 10-р сарын 15-ны өдрүүдэд  БНХАУ-ын Бээжин хотод  зохион байгуулагдаж дэлхийн 96 орны 3600 гаруй зочид кураторууд, 1200 гаруй мэргэжлийн зураач уран барималчид оролцсон олон улсын дүрслэх урлагийн том үзэсгэлэн уралдаан юм.  Уг олон улсын урлагийн биенналийг  БНХАУ –ын Төрийн Зөвлөл  2003 онд анх санаачлан  зохион байгуулснаас хойш Хятадын утга зохиол болон урлагийн дугуйлангийн холбоо, Бээжин хотын захиргаа, Хятадын уран бүтээлчдийн холбооноос ивээн  тэтгэж 2003, 2005, 2008, 2010, 2012, 2015 2017 онуудад 7 удаа амжилттай зохион байгуулагдаж өнгөрсөн 10 жилд 1 сая гаруй уран бүтээлчид дэлхийн 45-96 орноос оролцсон 2 жил тутам  нэг удаа болдог олон улсын хэмжээний  дүрслэх урлагийн  нэр хүндтэй  А зэрэглэлийн үзэсгэлэн уралдаан юм.    Уг  үзэсгэлэн уралдаанд Монголын Урчуудын хорооны удирдах бүрэлдэхүүнтэй хамт манай 27н уран бүтээлчид Монголдоо шалгарсан шилдэг дүрслэх урлагийн бүтээлүүдээ дэлгэн байршуулж, оролцсноос зөвхөн зураач Мягмарын Баярмагнайн  “Миний нутаг” монгол зургийн  уран бүтээл 2017 оны Бээжингийн олон улсын биенналийн шилдэг  бүтээлээр шалгарч, өөрийн орны дүрслэх урлаг, монгол зургийн чансааг олон улсын түвшинд харуулж улс орноо сурталчлан  таниулж чадлаа.  Одоо түүний “ Миний нутаг” бүтээл нь  Бүх Хятадын Дүрслэх урлагийн Үндэсний Музейн сан хөмрөгт  SY171227 кодтойгоор Монгол улсаа төлөөлөн хадгалагдаж байна.